Luka 9

1 A o Isus vičinđa e dešuduje apostolen hem dinđa len zoralipe hem autoritet upro sa o demonja hem te sasljaren o nambormipa. 2 I bičhalđa len te propovedinen oto carstvo e Devlesoro hem te sasljaren e nambormen. 3 Angleder so te džan, phenđa lenđe: “Ma legaren tumencar ništa ko drom: ni štapi, ni torba dromese, ni maro, ni love, hem te na ovel tumen aver gad. 4 Sa đikote ačhovena ki nesavi diz, bešen ano jekh čher hem ma nakhen ko aver čhera. 5 Te na mangle tumen nesave dizutne, iklindoj tari adaja diz, tresinen i prašina tumare prendar sar znako dai kriva so na lelje o lafi e Devlesoro.” 6 I on džele taro than ko than, vaćerindoj o Šukar lafi hem sasljarindoj e nambormen ko sa o thana. 7 A o Irod o vladari šunđa sa so ulo i inele zbunime adalese so nesave vaćerde da o Jovan o Krstitelj uštino taro mule. 8 A avera vaćerde da o proroko o Ilija mothovđa pe ki phuv, a nesave avera vaćerde da taro mule uštino nesavo proroko taro purano vreme. 9 A o Irod phenđa: “Me čhinđum e Jovanesoro šero. A kovai onda akava kastar sa adava šunava?” I manglja te dikhel e Isuse. 10 I ked o apostolja irinde pe koro Isus, vaćerde lese sa so ćerde. I o Isus legarđa len peja hem cidinđa pe olencar, nakori diz vičime Vitsaida, te šaj oven korkore. 11 A o narodo šunđa adava i dželo palo lende. A o Isus dodžaćerđa len šukar, vaćerđa lenđe oto carstvo e Devlesoro hem sasljarđa e nambormen. 12 A ked lelja te perel i rat, o dešuduj apostolja nakhle đi o Isus hem phende lese: “Te phene ine e narodose te džan ko pašutne gava hem thana kote šaj te arakhen nešto xajbnase hem than sojbnase. Adalese so injam akate ko čučo than kote nane ništa xajbnase hem nane than sojbnase.” 13 A o Isus phenđa lenđe: “Den len tumen nešto xajbnase!” A on phende: “Ali isi amen samo pandž mare hem duj maćhe. Amen li te dža te čina xajbnase zako sa akava narodo?” 14 Adari inele đi ko pandž hiljade murša. Tegani o Isus phenđa ple učenikonenđe, e apostolenđe: “Čhiven len te bešen ko kupe po pinda.” 15 I ćerde ađahar, čhivde sarijen te bešen. 16 O Isus lelja o pandž mare hem o duj maćhe, dikhlja naupre ko nebo, zahvalinđa e Devlese zako mare hem zako maćhe hem phaglja len. Tegani dinđa o mare hem e maćhen ko učenici te ulaven len e manušenđe. 17 I sare xale đikote na čalile. A palo adava, dešuduj korpe čedinde pe okolestar so ačhilo oto xajba. 18 A jekh dive o Isus inele korkoro ple dešuduje učenikonencar, i molinđa pe. I ked završinđa i molitva, pučlja e učenikonen: “So phenela o narodo, kova injum me?” 19 A on phende: “Nesave manuša phenena da tu injan o Jovan o Krstitelj, a nesave avera phenena da tu injan o proroko o Ilija, a palem nesave avera phenena da tu injan jekh oto avera proroci taro purano vreme kova uštino taro mule.” 20 Tegani o Isus pučlja e učenikonen: “A so tumen phenena, kova injum me?” O Petar phenđa: “Tu injan o Hrist, kole o Devel bičhalđa!” 21 A o Isus naredinđa e učenikonenđe te na vaćeren nikase dai ov o Hrist. 22 I phenđa: “Me, o Čhavo e Manušesoro, valjani but te patinav. O starešine, o šerutne sveštenici hem o učitelja e Mojsijasere zakonestar na ka prihvatinen man. O manuša ka mudaren man, ali o trito dive o Devel ka vazdel man taro mule.” 23 I o Isus vaćerđa ple učenikonenđe hem sa e narodose so inele adari: “Kova mangela te ovel mlo učeniko, nek ačhaj plo dživdipe, nek lel plo krsto taro dive ko dive hem nek phirel pala mande. 24 Adalese so đijekh kova mangela plo dživdipe te arakhi, ka našali le, a kova dela plo dživdipe zbog mande, ka ovel le večno dživdipe. 25 Na vredini ništa e manušese hem sa i phuv te ovel ine olesiri te na lelja o dživdipe savoi čačikano. 26 Adalese kova lađala mandar hem mle lafonendar, hem me, o Čhavo e Manušesoro, ka lađav olestar ked ka irinav ki phuv ano sjaj savo ka ovel sar o sjaj mle Dadesoro hem e svetone anđelengoro. 27 A čače vaćerava tumenđe, isi nesave akalendar so terđona akate kola naka meren đikote na dikhena o carstvo e Devlesoro.” 28 Ked nakhle sar đi ofto dive sar o Isus phenđa adava, lelja peja e Petre, e Jovane hem e Jakove i dželo ki gora te molini pe. 29 I sar ine molini pe, lesoro muj ulo averčhane hem lesere šeja ule but parne hem sjajna. 30 I dikh, nekotar iklile duj manuša ano baro sjaj, o Mojsije hem o Ilija, hem lelje te vaćeren e Isuseja. 31 On vaćerde e meribnastar savo adžićeri ano Jerusalim e Isuse. 32 A o Petar hem okola so inele oleja, zasuće. Ked uštine, dikhle e Isuse ano baro sjaj hem e duje manušen sar terđona oleja. 33 I ked lelje o Mojsije hem o Ilija te ciden pe e Isusestar, o Petar phenđa e Isusese: “Gospodarona, šukari amenđe akate so injam. Te ćera trin šatorja: jekh tuće, jekh e Mojsijase hem jekh e Ilijase.” Na džanđa so vaćeri. 34 Sar ine vaćeri adava, iklilo jekh oblako savo učharđa len. A o učenici darandile ked učharđa len o oblako. 35 I šundilo glaso taro oblako savo vaćerđa: “Akavai mlo Čhavo, kole birinđum! Ole šunen!” 36 I palo adava so šundilo o glaso, o učenici dikhle samo e Isuse korkore. I trainde, hem tegani pana nikase na vaćerde adalestar so dikhle. 37 Tejsato dive, ked o Isus hem o trin učenici huljile tari gora, baro narodo alo te dikhel e Isuse. 38 I dikh, nesavo manuš taro narodo lelja te vičini: “Učitelju, molinava tut te pomožine mle čhavese, adalese soi maje jekhoro! 39 O bišukar duho but puti prelela le hem otojekhvar vrištini; frdela le ano grčevija hem ikljola lestar pena taro muj; uništini le hem skoro nisar na ačhaj le. 40 I molinđum te učenikonen te ispudinen e bišukare duho mle čhavestar, ali on našti ine.” 41 A o Isus phenđa: “O, biverakere hem rumime manušalen! Sa edobor vreme injum tumencar, a palem na verujinena. Pučav man pana kobor valjani te trpinav tumen. Ana te čhave akari!” 42 I sar o čhavoro avela ine đi o Isus, o demoni frdinđa le ki phuv ano grčevija. A o Isus naredinđa e melale duhose te cidel pe e čhavorestar, sasljarđa e čhavore hem phenđa lesere dadese: “Ače to čhavo.” 43 Tegani sare inele začudime so dikhle e Devlesoro baro zoralipe. Sar sare čudinena pe ine zako adava so ćerđa o Isus, ov phenđa ple učenikonenđe: 44 “Šunen šukar akala lafija: Me, o Čhavo e Manušesoro, valjani te ovav predime ano vasta e bišukare manušengere.” 45 Ali o učenici na xalile so o Isus manglja te vaćeri adaleja. Adava inele olendar garavdo sar te na xaljoven le, a darandile te pučen le so adaleja manglja te vaćeri lenđe. 46 A o učenici lelje maškara pumende te raspravinen kova šaj olendar te ovel najbaro. 47 A o Isus džanđa soi lenđe ki godi, lelja jekhe čhavore, čhivđa le uzala peste, 48 i phenđa lenđe: “Đijekh kova primini akale čhavore zbog maje, man primini. A đijekh kova man primini, primini e Devle kova bičhalđa man. Kova maškara tumende pes dikhela sar najtikore, ole o Devel dikhela sar najbare.” 49 A o Jovan phenđa e Isusese: “Gospodarona, dikhljam nesave manuše sar ano to anav ispudini e demonen e manušendar. Amen o učenici na mukljam lese te ćerel adava, adalese so na džala amencar pala tute.” 50 A o Isus phenđa lese: “Muken le te ćerel adava, adalese so okova kova nane protiv tumende, ovi tumencar!” 51 A ked inele paše o dive e Isusesere te ovel vazdime ko nebo, ov zorale odlučinđa te džal ko Jerusalim. 52 I bičhalđa nesave manušen angla peste. I on džele hem đerdinde ko nesavo gav e Samarijakoro te pripreminen le e Isusese. 53 Ali o gavutne na mangle e Isuse adalese so džande da džala ko Jerusalim. 54 A dikhindoj adava o učenici o Jakov hem o Jovan, pučle e Isuse: “Gospode, mangeja li te phena te huljel taro nebo i jag hem sa te tharel len?” 55 A o Isus irinđa pe hem phenđa lenđe da nane šukar so ađahar mislinena. 56 I ov hem lesere učenici džele ko aver gav. 57 I sar o učenici hem o Isus džana ine dromeja, nesavo manuš alo hem phenđa e Isusese: “Ka džav tuja kaj god tu džaja.” 58 A o Isus phenđa lese: “E lisicen isi jame hem e čirikljen gnezdija, a o Čhavo e Manušesoro nane le kaj te pašljari plo šero.” 59 A avere manušese phenđa: “Phir pala mande!” A ov phenđa: “Aš samo, Gospode, te parunav mle dade.” 60 Tegani o Isus phenđa lese: “Muk o mule te parunen ple mulen, a tu dža vaćer oto carstvo e Devlesoro.” 61 A aver manuš phenđa: “Ka phirav pala tute, Gospode, ali aš te džav te pozdravinav man mle čherutnencar.” 62 A o Isus phenđa lese: “Nijekh kova dolela pe upro plugo te orini i onda dikhela napalal, nane korisno zako carstvo e Devlesoro.”