Salamo 102

1

2 Ko aeta’o amako ty lahara’o añ’andron-kaloviloviañe. atokilaño amako ty ravembia’o; malisà hanoiñe ahy ami’ty andro ikanjiako.

3 Mihelañe hoe hatoeñe o androkoo; miforehetse hoe an-toñak’ ao o taolakoo.

4 Pinaoke hoe ahetse ty troko vaho miheatse toe andikofako ty mitozin-kaneñe.

5 Mipitek’ an-taolako ao ty holiko ty ami’ty volam-piselekaiñako.

6 Hoe tangongo am-patrañe añe raho, hoe vorondolon-dratraratra.

7 Mandre an-tsareke raho; manahake ty tivoke miereñereñe an-tampènake ey.

8 Mañinje ahy lomoñandro o rafelahikoo; mamàtsy ahiko o mpirengevok’amakoo,

9 Fa nihaneko hoe ampemba ty lavenoke, vaho linaroko firovetse ty finomako,

10 ty ami’ty haviñera’o naho ty fifombo’o, fa rinambe’o raho le nahifi’o añe.

11 Manahake ty fipononòran-talinjo o androkoo; vaho miheatse hoe boka raho.

12 Nainai’e eo rehe ry Iehovà, ty Tahina’o an-tarirats’ an-tariratse.

13 Hiongake rehe hitretre i Tsiône, fa tsatoke te hisohe’o, ie tondroke i nifantañañey.

14 No’ o mpitoro’oo o vato’eo; mbore kokoa’ iereo o lembo’eo.

15 Soa te hañeveña’ o fifeheañeo ty tahina’ Iehovà, naho ze hene mpanjaka’ ty tane toy ty enge’o;

16 fa nitratrañàhe’ Iehovà ty Tsiône ie niboak’ amy enge’ey.

17 Nihaoñe’e ty halali’ o poi’eo; vaho tsy niambohoa’e ty toreo’ iareo

18 Ho patereñe ho a ty tariratse mandimbe, soa te handrenge Ià ondaty mboe tsy nanoeñeo:

19 Nivazohoe’e boak’an-toe’e masiñe ankaboañ’ añe, nisary ty tane toy boak’ an-dikerañe eñe t’Iehovà,

20 hijanjiñe ty fiñeoñeom-pirohy, hañaha o nafatse havetrakeo

21 soa te ho talilie’ ondaty e Tsiône ao ty tahina’ Iehovà, naho ty enge’e e Ierosalaime ao,

22 ie mifanontoñe ondatio, naho o fifeheañeo hitoroñe Iehovà.

23 Nado’e deme’e raho añivon-dalañe eo; nitomore’e o androkoo.

24 Hoe raho, Ry Andrianañahareko, ehe, ko ampisintahe’o añivo’ o androkoo raho; mitakatse ze kila tariratse o tao’oo.

25 Haehae rehe ro nañoreñe ty tane toy, satam-pità’o o likerañeo.

26 Ho momoke iereo, fa nainai’e eo rehe; fonga hikoneatse hoe sikiñe hambo’e, ampilimbeze’o hoe sarimbo vaho ho vaoe’o iereo.

27 Fe tsy mihotike rehe, tsy mbia higadoñe o tao’oo.

28 Le lia’e ho eo o anam-pitoro’oo, le hijadoñe añatrefa’o eo o tiri’eo.