Joba 41

1 Mahatarike i Leviatàne am-bintañe v-iheo? hatindri’o ambane an-tàly hao i lela’ey?

2 Lefe’o hao ty mampikiviro i oro’ey, ndra ty hangirike i soma’ey am-pengoke?

3 Hanao lako halaly ama’o hao re? Ke hivolañe mora ama’o?

4 Hifañina ama’o hao, handrambesa’o aze ho fetrek’oro’o kitro katroke?

5 Ho hisà’o hao hoe voroñe? ke ho tantalie’o ho amo anak’ ampela’oo.

6 Hifampihehetse ama’e hao o mpanao balikeo? Ho zarae’ iareo am’ o mpanao takinakeo hao re?

7 Ho tsitsihem-pirango hao i holi’ey? Ndra i loha’ey an-defom-piañe?

8 Apaoho ama’e ty fità’o vaho tiahio i ho ali’oy te tsy hindroe’o.

9 Hete! Toe tsy vente’e t’ie salalaeñe, tsy ho tafahohoke hao te isahañe?

10 I Tsy eo ty lahitsi’ay mahavany hitsobore aze; ia arè ty mahafiatreatre amako?

11 Ia ty nanolotse ahy, te havahako? ahiko ze hene ambanen-dikerañe ao.

12 Tsy hitsiñeko o kitso’eo, ty haozara’e ra’elahiy, vaho i sandri’e tsaratseakey,

13 Ia ty hañolitse o sisin-koli’eo? Ia ty hahafizilik’ añivom-balañorà’e roe ao?

14 Ia ty mahafisokake o lalam-bein-tarehe’eo? mampangetraketrake ty fañarikatoha’ o nife’eo.

15 Fisengea’e o sisì’e fatratseo, ie mikititse hoe linite;

16 Akore ty fifampikiteha’e kanao tsy mahafitsifitse ao ty tioke.

17 Nifampireketeñe iereo, mifampipiteke, tsy lefe akatrake.

18 Mitsopela-kazavàñe o fihatsìhe’eo, manahake ty holi-maso’ i maraindraiñey o maso’eo.

19 Failo milebaleba ty miakatse am-bava’e, afo mipelatse ty mipitsike mb’eo.

20 Mañatoeñe o loa-koro’eo, hoe valàñe mamorotse ambone vinda mirehetse.

21 Mamiañe foroha ty kofò’e, afo misodotse ty miboak’ am-bava’e ao.

22 Mimoneñe an-kàto’e ty haozarañe, vaho mitsinjak’ aolo’e eo ty miroreke.

23 Mifampirekets’ ama’e i holi’e mifanosokeo, gañe ama’e zay tsy mete asitse.

24 Gañe hoe vato ty fo’e; manahake ty hamafem-bato-lisañe ambane.

25 Ie mivoalatse, miholi-tsandry o fanalolahio; ie vereñe mamoe’ay.

26 Tsy lefe t’ie liherem-pibara, ndra lefoñe, ndra ana-defo, ndra baramino masioñe.

27 Atao’e ho boka maike ty viñe, naho hatae voroke ty torisìke.

28 Tsy mahafandrifitse aze o ana-paleo; atao’e forompotse o vato-piletseo.

29 Tonton-drongoñe ama’e o kobaiñeo, tohafa’e o lefoñe mikaratsakaratsakeo.

30 Silam-balañe-tane masioñe ty ambane’e, hoe mamofopofoke ampemba t’ie miranga fotake.

31 Ampitroatroahe’e hoe valàñe i lalekey; ampanahafe’e ami’ty fampitranahañe rano mañitse i riakey.

32 Anoe’e lala-miloeloe ty am-boho’e ao anoe’e hoe a maròy foty i lalekey.

33 Tsy ambone-tane atoy ty mañirinkiriñe aze, ie nitsenèñe tsy ho aman-tahotse.

34 Jilojilove’e iaby ze atao abo; ie ty lohà’ ze hene anam-pirengevohañe.