Joba 32

1 nAa le nijihetse tsy nanoiñe Iobe indaty telo rey, ie nivañoñe am-pihaino’e avao.

2 Niforoforo amy zao ty haboseha’ i Elihò ana’ i Barakele ana’ i Bozý nte-Rame; niforoforoe’e t’Iobe amy t’ie mañatò-vatañe añatrefan’ Añahare,

3 nahabosek’ aze ka i rañe’ Iobe telo rey amy te tsy nahavale, fe ndra namatse Iobe.

4 Ie amy zao, nandiñe ty hazoke’ iareoy t’i Eliho vaho nisaontsy am’Iobe.

5 Aa ie nioni’ i Eliho te tsy aman-katoi’e ty falie’ indaty telo rey, le nifombo an-kaboseke.

6 Aa le nanoiñe ami’ty hoe t’i Eliho ana’ i Barakele ana’ i Bozý: Toe tora’e an-taoñe raho, androa­navy nahareo; le nihemban-draho tsy nahavany hitaroñe ty heveko.

7 Hoe raho: O androo ro hilañoñe, ty hamaro taoñe ro hañoke hihitse.

8 Fe i arofo am’ondatioy, naho i kofòn’ El-Sadaiy ty manolo-kilala am’iareo.

9 Tsy t’ie antetse ro mahihitse, tsy te zoke ro mahilala ty hatò.

10 Aa le hoe raho, Janjiño; hitaroñe o entakoo ka.

11 Ie zao, nahaliñe o asa’ areoo raho, tsinanoko o niereñerea’ areoo, ie nitsikarahe’areo ty ho lañoneñe.

12 Toe nitsendreñe anahareo raho, fe leo raike tsy nahafandietse Iobe, ndra raik’ ama’ areo tsy nahavale o enta’eo.

13 Ko manao ty hoe: Nitendreke hihitse zahay; ho roahen’ Añahare, fa tsy ondaty.

14 Tsy nalaha’e amako o saontsi’eo, vaho tsy o lañona’areoo ty hatoiko.

15 Angoae iereo, tsy mamale ka; nijiañe ty saontsi’ iareo.

16 Aa handiñe avao hao raho? ie nijohañe, tsy mahafanoiñe.

17 Hivaleako ka ami’ty ahiko; hitaroñe ty heveko.

18 Toe lifo-bolan-draho; manjitse ahy ty trok’ amako atoa.

19 Toe manahake ty divay tsy amam-pikofò’e ty troko, fa hiporitsake hoe zonjòn-divay vao.

20 Adono hivolan-draho hanintsiñako; Apoho hanoka-tsoñy hitoiñako.

21 Ehe te tsy eo ty ho rihieko, ndra t’indaty ho lombofeko.

22 Tsy haiko ty mitsiriry fa ho nasintan’ Andrianamboatse aniany.