Joba 28

1 Toe ao ty lakato fitsikaraham-bolafoty naho ty toem-pitranaham-bolamena.

2 Akareñe an-debok’ ao ty viñe, le tranaheñe am-bongam-bato ty torisike.

3 Fongore’e ty ieñe, tsikarahe’e pak’ am-para-piefera’e ao ty vato, an-kamoromoroñañe naho an-talinjon-kavilasy ao.

4 Anokafa’e lalam-pigodañañe, ­lavi-pimoneñañe; andikofam-pandia, ­miradorado ao, mitsikadròtse ­lavits’ ondaty.

5 Ty tane toy, ama’e ty iboaha’ ty mahakama; ambane’e ao hoe trobotroboen’ afo.

6 Angalan-tsafira o vato’eo, naho volamena an-debo’e ao.

7 Tsy hay o voro-pamaokeo i lalañey; tsy trea’ ty maso’ i hitikitikey.

8 Tsy nilià’ o bibi-ly mpireñetseo; mbe tsy nipiapia ambone’e eo ty liona.

9 Ahiti’e mb’amo vato-pilakeo ty fità’e vaho avalitaboa’e reke-bahatse o vohitseo.

10 Kaohe’e amo vatoo ty talàha vaho oni-pihaino’e ze atao vara.

11 Sebaña’e o torahañeo tsy hiorike; aboa’e mb’an-kazavàñe o raha nikafitseo.

12 Fe aia ty hahaoniñañe hihitse? Aia ka ty toe’ o hilalao?

13 Tsy fohi’ondaty ty vili’e, toe tsy tendrek’ an-tane’ o veloñeo.

14 hoe i lalekey, Tsy amako atoa; le hoe i riakey, Tsy amako etoa.

15 Tsy ikaloam-bolamena, vaho tsy andanjàm-bolafoty.

16 Tsy añoharañe ami’ty volamena’ i Ofire, ndra an-tsohame sarotse ndra safira.

17 Tsy añirinkiriña’ ty volamena ndra ty kristaly, tsy tsalohem-panake volamena ki’e.

18 Tsy ivolañañe ty vaton-driake ndra vato-soa; ambone’ o hangeo ty fikaloan-kihitse.

19 Tsy oharañe ama’e ty pit-dae’ i Kose, tsy ibalibalihem-bolamena hiringiri’e.

20 Hirik’ aia arè o hihitseo? Vaho aia ty toe’ o hilalao?

21 Ie mikafits’ am-pihaino’ ze atao veloñe, vaho mietak’ amo voron-tiokeo.

22 Hoe ty Tsikeokeoke naho i Havilasy: fa nahatsanon-talily aze o sofi’aio.

23 Arofoanan’ Añahare i lala’ey, fohi’e ka i toe’ey.

24 Jilove’e pak’ añ’olo’ ty tane toy, vazoho’e ze he’e ambanen-dikerañe ao.

25 Ie nanolora’e lanja o tiokeo, vaho nanjara’e an-kapoake o ranoo;

26 ie nafepè’e o orañeo, naho ty lala’ o helats’ampiñeo;

27 Le nivazohoe’e, nitseize’e; najado’e vaho tsinikara’e.

28 Le hoe re am’ondatio, Inao: Ty fañeveñañe amy Talè, Zay ro hihitse; ty fisitahañe an-karatiañe ro hilala.