Hebreo 5

1 Toe tinendre hitoloñe ty am’ondatio, amo raha mioza aman’ Añahareo, ze hene mpisorom-bey rinambe am’ ondatio, hibanabana naho hisoroñe, hañefetse hakeo.

2 Maha-fitretrè o tsy mahilalao naho o mandrìkeo re, amy t’ie arisehoan-kaosañe ka.

3 Zay ty isoroña’e ty amo hakeo’ ondatio, naho o azeo ka.

4 Le tsy ia ty mandrambe i engeñey am-bata’e, fe rambese’ ze kanjien’ Añahare, manahak’ i Arone.

5 Toe tsy nisenge ho mpisorom-bey ka i Norizañey, fe teo t’ie nanoeñe ty hoe: Anako rehe, Anindroany ty nisamahako azo.

6 mbore teo ty nanovoña’e ty hoe: Mpisoroñe nainai’e rehe ami’ty famosora’ i Melkizedeke. (aiōn g165)

7 Ie tañ’ andro ama’ nofotse aze, le nibanabana halaly naho hatak’ an-toreo miharo ranom-pihaino amy mahahah’ aze an-kavilasiy, vaho jinanjin-dre ty amy fiambanea’ey.

8 Aa ndra t’ie Anake, niohe’ i halovilovia’ey te hivohotse.

9 Le ie nifonireñe ro nanoeñe lohàm-pandrombahañe tsy modo ho amo mivohotse ama’eo (aiōnios g166)

10 naho kinanjin’ Añahare ho Mpisorom-bey am-pamosora’ i Melkizedeke.

11 Mbe maro ty ho tsaraeñe ty ama’e, f’ie ho saro-pampidodeañe ty amy hakarèña’ areo.

12 Tsy ho ni-mpañoke hao nahareo henaneo? te mone mipay haòke amo manantam-petsen’ Añahareo indraike, vaho mipay ronono fa tsy mahakama vente’e,

13 toe tsy zatse o tsaran-kavantañañeo ze veloñe an-dronono, fa mbe anak-ajaja;

14 toe ho a o matoeo ty mahakama vente’e, ie fa niòke am-pitoloñañe haha-fañavake ty soa ami’ty raty.