Job 41
1 an extrahere poteris Leviathan hamo et fune ligabis linguam eius
An extrahere poteris Leviathan hamo, et fune ligabis linguam ejus?
2 numquid pones circulum in naribus eius et armilla perforabis maxillam eius
Numquid pones circulum in naribus ejus, aut armilla perforabis maxillam ejus?
3 numquid multiplicabit ad te preces aut loquetur tibi mollia
Numquid multiplicabit ad te preces, aut loquetur tibi mollia?
4 numquid feriet tecum pactum et accipies eum servum sempiternum
Numquid feriet tecum pactum, et accipies eum servum sempiternum?
5 numquid inludes ei quasi avi aut ligabis illum ancillis tuis
Numquid illudes ei quasi avi, aut ligabis eum ancillis tuis?
6 concident eum amici divident illum negotiatores
Concident eum amici? divident illum negotiatores?
7 numquid implebis sagenas pelle eius et gurgustium piscium capite illius
Numquid implebis sagenas pelle ejus, et gurgustium piscium capite illius?
8 pone super eum manum tuam memento belli nec ultra addas loqui
Pone super eum manum tuam: memento belli, nec ultra addas loqui.
9 ecce spes eius frustrabitur eum et videntibus cunctis praecipitabitur
Ecce spes ejus frustrabitur eum, et videntibus cunctis præcipitabitur.]
10 non quasi crudelis suscitabo eum quis enim resistere potest vultui meo
[Non quasi crudelis suscitabo eum: quis enim resistere potest vultui meo?
11 quis ante dedit mihi ut reddam ei omnia quae sub caelo sunt mea sunt
Quis ante dedit mihi, ut reddam ei? omnia quæ sub cælo sunt, mea sunt.
12 non parcam ei et verbis potentibus et ad deprecandum conpositis
Non parcam ei, et verbis potentibus, et ad deprecandum compositis.
13 quis revelavit faciem indumenti eius et in medium oris eius quis intrabit
Quis revelabit faciem indumenti ejus? et in medium oris ejus quis intrabit?
14 portas vultus eius quis aperiet per gyrum dentium eius formido
Portas vultus ejus quis aperiet? per gyrum dentium ejus formido.
15 corpus illius quasi scuta fusilia et conpactum squamis se prementibus
Corpus illius quasi scuta fusilia, compactum squamis se prementibus.
16 una uni coniungitur et ne spiraculum quidem incedit per eas
Una uni conjungitur, et ne spiraculum quidem incedit per eas.
17 una alteri adherebunt et tenentes se nequaquam separabuntur
Una alteri adhærebit, et tenentes se nequaquam separabuntur.
18 sternutatio eius splendor ignis et oculi eius ut palpebrae diluculi
Sternutatio ejus splendor ignis, et oculi ejus ut palpebræ diluculi.
19 de ore eius lampades procedunt sicut taedae ignis accensae
De ore ejus lampades procedunt, sicut tædæ ignis accensæ.
20 de naribus eius procedit fumus sicut ollae succensae atque ferventis
De naribus ejus procedit fumus, sicut ollæ succensæ atque ferventis.
21 halitus eius prunas ardere facit et flamma de ore eius egreditur
Halitus ejus prunas ardere facit, et flamma de ore ejus egreditur.
22 in collo eius morabitur fortitudo et faciem eius praecedet egestas
In collo ejus morabitur fortitudo, et faciem ejus præcedit egestas.
23 membra carnium eius coherentia sibi mittet contra eum fulmina et ad locum alium non ferentur
Membra carnium ejus cohærentia sibi: mittet contra eum fulmina, et ad locum alium non ferentur.
24 cor eius indurabitur quasi lapis et stringetur quasi malleatoris incus
Cor ejus indurabitur tamquam lapis, et stringetur quasi malleatoris incus.
25 cum sublatus fuerit timebunt angeli et territi purgabuntur
Cum sublatus fuerit, timebunt angeli, et territi purgabuntur.
26 cum adprehenderit eum gladius subsistere non poterit neque hasta neque torax
Cum apprehenderit eum gladius, subsistere non poterit, neque hasta, neque thorax:
27 reputabit enim quasi paleas ferrum et quasi lignum putridum aes
reputabit enim quasi paleas ferrum, et quasi lignum putridum æs.
28 non fugabit eum vir sagittarius in stipulam versi sunt ei lapides fundae
Non fugabit eum vir sagittarius: in stipulam versi sunt ei lapides fundæ.
29 quasi stipulam aestimabit malleum et deridebit vibrantem hastam
Quasi stipulam æstimabit malleum, et deridebit vibrantem hastam.
30 sub ipso erunt radii solis sternet sibi aurum quasi lutum
Sub ipso erunt radii solis, et sternet sibi aurum quasi lutum.
31 fervescere faciet quasi ollam profundum mare ponet quasi cum unguenta bulliunt
Fervescere faciet quasi ollam profundum mare, et ponet quasi cum unguenta bulliunt.
32 post eum lucebit semita aestimabit abyssum quasi senescentem
Post eum lucebit semita: æstimabit abyssum quasi senescentem.
33 non est super terram potestas quae conparetur ei qui factus est ut nullum timeret
Non est super terram potestas quæ comparetur ei, qui factus est ut nullum timeret.
34 omne sublime videt ipse est rex super universos filios superbiae
Omne sublime videt: ipse est rex super universos filios superbiæ.]
