ଏବ୍ରି 13

1 ୧ କ୍ରୀସ୍ତାନା ତାୟିୟାଁ ଅ଼ଡ଼େ ତାଙ୍ଗିସ୍କା ରଅତେରି ରଅଣାଇଁ ଜୀୱୁ ନ଼ୱୁ ।

2 ୨ ପୁନାଆତି ଗତାୟାଁଣି ସେ଼ବା କିହାଲି ବା଼ଣା ଆ଼ଆଦୁ, ଇଚିହିଁ ଏଲେକିତାକି ଏଚରଜା଼ଣା ପୁନାଆନା ଲାକପୂରୁତି ଦୂତୁୟାଁଣି ସେ଼ବା କିହାମାନେରି ।

3 ୩ କାୟିଦିତା ମାନାରାଇଁ ମୀରୁ ଏ଼ୱାରିତଲେ କାୟିଦିତା ମାନି ଲେହେଁ ଅଣ୍‌ପାଦୁ ଇଞ୍ଜାଁ ଆଙ୍ଗା ତଲେ ମାନାକି ଦୁକୁ କସ୍ତ ବେଟାଆ଼ହିମାନାରି ତଲେ ସମାନା ଦୁକୁ କସ୍ତ ବେଟାଆ଼ହାଲି ଅଣ୍‌ପାଦୁ ।

4 ୪ ବୀହା ବାରେ ଲ଼କୁ ନ଼କିତା ନେହାୟି ଆ଼ପେ, ଇଞ୍ଜାଁ ଡକ୍ରି ଅ଼ଡ଼େ ଡକ୍ରା ମା଼ନି ତଲେ ଡ଼ୟାପୁ, ଏ଼ନାଆଁତାକି ଇଚିହିଁ ମାହାପୂରୁ ଲାଗେଏତି କାମା ଅ଼ଡ଼େ ଦା଼ରିକାମା କିନାରାଇଁ ନୀହାଁୟି କିନେସି ।

5 ୫ ତା଼କିନି ତା଼କୁତା ଦ଼ନ ଜୂପ୍‌କା ଆ଼ଆଦୁ, ମିଙ୍ଗେ ଏ଼ନାୟି ମାନେ, ଏମ୍ବାଆଁ ରା଼ହାଁତଲେ ମାଞ୍ଜୁ, ଇଚିହିଁ ମାହାପୂରୁ ଏଲେଇଞ୍ଜା ମାନେସି, “ନା଼ନୁ ନିଙ୍ଗେ ଏଚେଲାୱା ପିସ୍ତଅଁ, ନା଼ନୁ ନିଙ୍ଗେ ଏଚେଲାୱା ବା଼ଣାଆୟଅଁ ।”

6 ୬ ଈଦାଆଁତାକି ମା଼ର ସା଼ସାତଲେ ଏଲେଇଞ୍ଜାଲି ଆ଼ଡିନାୟି, “ପ୍ରବୁ ନା଼ ସା଼ୟେମି ଆ଼ନାସି, ନା଼ନୁ ଇଚାଣି ଆଜଅଁ, ମାଣ୍‌ସି ନାଙ୍ଗେ ଏ଼ନାଆଁ କିହାଲି ଆ଼ଡାନେସି?”

7 ୭ ଆମିନି ଗାଟାରି ମିଙ୍ଗେ ମାହାପୂରୁତି ବ଼ଲୁ ୱେସାମାଞ୍ଜାତେରି, ମୀରୁ ଏଲେତି କାଜାରାଇଁ ମା଼ନି କିଦୁ; ଏ଼ୱାରି ଏ଼ନିକିଁ ନୀଡାମାଚେରି ଇଞ୍ଜାଁ ହା଼ତେରି, ଏ଼ଦାଆଁ ଅଣ୍‌ପାନା ଏ଼ୱାରି ନାମିତି ଲେହେଁ ମୀରୁ ଜିକେଏ ନାମାଦୁ ।

8 ୮ ଜୀସୁ କ୍ରୀସ୍ତ ରେଃଏନି, ନୀଞ୍ଜୁ ଅ଼ଡ଼େ କା଼ଲେଏ ତାକି ସମାନା ଡ଼ୟିନେସି । (aiōn g165)

9 ୯ ଏଟ୍‌କା ଅ଼ଡ଼େ ଅ଼ର ର଼ଲେତି ଜା଼ପ୍‌ନି ତା଼ଣା କିଲିବିଲି ଆ଼ଆଦୁ, ଇଚିହିଁ ତିନି ରା଼ନ୍ଦାତା ଆ଼ଏ, ସାମା ମାହାପୂରୁ କାର୍ମାଟି ହିୟାଁ ତୀରି ଆ଼ନାୟି ନେହେଁ; ଆମିନି ଗାଟାରି ତିନି ରା଼ନ୍ଦାତି ମେ଼ରା ମା଼ନୱି ଆ଼ନେରି, ଏ଼ୱାରାକି ଏ଼ନି ଲା଼ବା ଆ଼ଏ ।

10 ୧୦ ମା଼ ଇଲେତି ର଼ ପୂଜାପିଣ୍ତା ମାନେ, ଆମିନି ପୂଜା ପିଣ୍ତାତି ଦିଣ୍‌ସୁଇଁ ତୂମୁ ଇଲୁତା ସେ଼ବାକିନି ପୂଜେରାଙ୍ଗା ତିଞ୍ଜାଲି ଅଦିକାରା ହିଲେଏ ।

11 ୧୧ ଇଚିହିଁ ଜୀହୁଦିୟାଁତି କାଜା ପୂଜେରା ପା଼ପୁ ତାକି ହେର୍‌ପାମାନି ଜ଼ନ୍ତତି ନେତେରି ସୁଦୁ ଟା଼ୟୁତା ଅ଼ନେସି; ସାମା ଏ଼ ଜ଼ନ୍ତତି ଆଙ୍ଗା ବାରେ ସାମ୍‌ଣ୍ତା ପାଙ୍ଗାତା ତାଚାହାଁ ହୂଡ୍‌ୱିଆ଼ନେ ।

12 ୧୨ ଈଦାଆଁତାକି ଜୀସୁ ଜିକେଏ ତାନି ନେତେରି ତଲେ ଏ଼ନିକିଁ ଲ଼କୁଣି ସୁଦୁ କିନେସି, ଈଦାଆଁତାକି ଗା଼ଡ଼ା ପାଙ୍ଗାତା ହା଼ତେସି ।

13 ୧୩ ଈଦାଆଁତାକି ୱା଼ଦୁ, ମା଼ର ଜିକେଏ ଏ଼ୱାଣିଲେହେଁ ନିନ୍ଦା ଅ଼ର୍‌ହାନା ଗା଼ଡ଼ା ପାଙ୍ଗାତା ଏ଼ୱାଣି ତା଼ଣା ହାନ ।

14 ୧୪ ଏ଼ନାଆଁତାକି ଇଚିହିଁ ଇମ୍ବାଆଁ ବାରେ ଦିନାତାକି ମାଙ୍ଗେ ଡ଼ୟିନି ଗା଼ଡ଼ା ହିଲେଏ, ସାମା ମା଼ର ଡା଼ୟୁ ୱା଼ହିମାନି ଗା଼ଡ଼ାତି ବେଟାଆ଼ହାଲି ପାରିମାନାୟି ।

15 ୧୫ ଈଦାଆଁତାକି ୱା଼ଦୁ, ମା଼ର ଜୀସୁ ତା଼ଣାଟି ମାହାପୂରୁଇଁ ଜହରାତି ପୂଜା କିନ, ଇଚିହିଁ ତାନି ଦ଼ରୁ ଜ଼ଲିମାନି ଗୂତିତି ବାରେଦିନା ହେର୍‌ପିନ ।

16 ୧୬ ଏଟ୍‌କା ତାରାଇଁ ସା଼ୟେମି କିହାଲି ବା଼ଣା ଆ଼ଆଦୁ, ଇଚିହିଁ ଇଲେତି ପୂଜା କାମାତା ମାହାପୂରୁ ରା଼ହାଁ ଆ଼ନେସି ।

17 ୧୭ ମୀ କାଜାରାଇଁ ମା଼ନୱି ଆ଼ହାନା ଏ଼ୱାରାଇଁ ମା଼ନି କିଦୁ, ଇଚିହିଁ ଆମିନି ଗାଟାରି ମାହାପୂରୁକି ଲେକା ହୀନାୟି ମାନେ, ଏ଼ୱାରିଲେହେଁ ଏ଼ୱାରି ମୀ ଜୀୱୁତି କା଼ଚିମାନେରି, ଏ଼ନିକିଁ ଏ଼ୱାରି ଏ଼ଦାଆଁ ଦୁକୁ ତଲେ କିଆନା ରା଼ହାଁତଲେ କିହାଲି ଆ଼ଡିନେରି; ଦୁକୁ ତଲେ କିତିସାରେ ମିଙ୍ଗେ ଏ଼ନି ଲା଼ବା ହିଲେଏ ।

18 ୧୮ ମାଙ୍ଗେତାକି ପ୍ରା଼ତାନା କିଦୁ, ଇଚିହିଁ ମା଼ ନାମୁ ମାନେ, ମା଼ ଅଣ୍‌ପୁ ନେହାୟି ଆ଼ପେ, ଅ଼ଡ଼େ ବାରେ କାମାତା ନେହିଁ ମାଣ୍‌କି ଆ଼ହାଲି ମା଼ମ୍ବୁ ଅଣ୍‌ପିମାନମି ।

19 ୧୯ ଅ଼ଡ଼େ ନା଼ନୁ ମୀ ତା଼ଣା ଏ଼ନିକିଁ ତବେ ୱାୟାଲି ଆ଼ଡିଇଁ, ଏ଼ଦାଆଁତାକି ମାହାପୂରୁ ତା଼ଣା ପ୍ରା଼ତାନା କିହାଲି ନା଼ନୁ ମିଙ୍ଗେ ହା଼ରେକା ବାତିମା଼ଲିମାଞ୍ଜାଇଁ ।

20 ୨୦ ଆମିନି ହିତ୍‌ଡ଼ି ହିୟାନି ମାହାପୂରୁ କା଼ଲାକା଼ଲା ଡ଼ୟିନି ରା଼ଜିମା଼ନାତି ନେତେରି ତାକି, କାଜା ମେ଼ଣ୍ତା ଗ଼ଡ଼ୁ, ଇଚିହିଁ ମା଼ ପ୍ରବୁ ଜୀସୁଇଁ ହା଼ତାରି ତା଼ଣାଟି ନୀଟ୍‌ହା ମାନେସି; (aiōnios g166)

21 ୨୧ ଏ଼ୱାଣି ନ଼କିତା ଏ଼ନାୟି ନେହାୟି, ଏ଼ଦାଆଁ ଏ଼ୱାସି ମା଼ ହିୟାଁତା ଜୀସୁ କ୍ରୀସ୍ତ ତା଼ଣାଟି ରା଼ପ୍‌ହାନା ତାନି ମ଼ନଲେହେଁ କିହାଲି ମିଙ୍ଗେ ବାରେ ନେହିଁ କାମା କିୟାପେସି । ଏ଼ୱାଣାକି କା଼ଲାକା଼ଲାତି ଗାୱୁରମି ଆ଼ପେ! ଆ଼ମେନ୍‌ । (aiōn g165)

22 ୨୨ ଏ଼ ତାୟି ତାଙ୍ଗିସ୍କା, ନା଼ନୁ ମିଙ୍ଗେ ବାତିମା଼ଲିମାଞ୍ଜାଇଁ, ଈ ଜାଗ୍ରାତା କିୱିକିନି କାତା ସା଼ସା ଇଟାନା ମ଼ନ ହୀଦୁ, ଇଞ୍ଜାଁ ନା଼ନୁ ରା଼ହାଁ କିହାଲି ଈ ଊଣା ଆ଼କୁ ମିଙ୍ଗେ ରା଼ଚାମାଇଁ ।

23 ୨୩ ମା଼ ତାୟି ତିମତି କାୟିଦିଟି ତବେ ପିସ୍‌ପି ଆ଼ହାମାନେସି ଇଞ୍ଜିଁ ପୁଞ୍ଜେରି, ଏ଼ୱାସି ତବେ ୱା଼ତିସାରେ ଏ଼ୱାଣିତଲେ ନା଼ନୁ ମୀ ତା଼ଣା ବେ଼ଚିୱା଼ହାଲି ୱା଼ଇଁ ।

24 ୨୪ ମୀ ବାରେ କାଜାରାଇଁ ଅ଼ଡ଼େ ମାହାପୂରୁ ଲ଼କୁଇଁ ଜହରା ୱେହ୍‌ଦୁ । ଏମିନି ତାୟିୟାଁ ଇଟାଲି ଦେ଼ସାଟି ୱା଼ହାମାନେରି, ଏ଼ୱାରି ମିଙ୍ଗେ ଜହରା ୱେସିମାଞ୍ଜାନେରି ।

25 ୨୫ ମାହାପୂରୁତି କାର୍ମାମେହ୍‌ନାୟି ବାରେତେରି ମିଙ୍ଗେତାକି ଆୟାପେ ।